7PAGO

7 Pago Mendi Lasterketa izen bereko elkartearen ekimena da, Mallabiako mendiekiko sentitzen dugun lotura eta maitasunetik sortua.

Mendiko duatloi probak hainbat urtez antolatu ondoren, herri-trail lasterketa bat martxan jartzeko pausoa ematea erabaki genuen. Helburua argia da: korrikalariei Mallabiako txokorik berezienak ezagutaraztea.

Oiz mendia izango da lasterketaren erreferente nagusia, baina bertara iritsi aurretik parte-hartzaileek ur-jauziak, baso zaharrak eta askorentzat ezezagunak diren bidezidorrak zeharkatuko dituzte.

Kirol ekitaldiaz harago, asteburu osoan zehar Mallabiako herriaz, gastronomiaz eta ingurune naturalaz gozatzeko aukera eskaini nahi dugu.

7 Pago Mendi Lasterketa da Durangaldeko Koparen lehen geldialdia, eskualde osoko zortzi lasterketa batzen dituen trail zirkuituaren hasiera.

Herriz herri antolatutako ekimen batek sortutako proiektua da, mendia, komunitatea eta kirola ardatz dituena. Mallabia, Berriz, Zaldibar, Garai, Mañaria, Atxondo, Amorebieta eta Elorrio dira zirkuituko geltokiak.

Aurten bi sailkapen izango dira: DURANGALDEKO MARI KOPA (distantzia luzeko lasterketak) eta DURANGALDEKO SUGAAR KOPA (distantzia motzekoak). Bi sailkapenek eskualdeko zortzi lasterketen emaitzak batzen dituzte.